ISANG buwang ‘aampunin” ng city government ng Imus ang 20 elementary student mula Yeoncheon City ng Republic of South Korea (SoKor).
The best among the best ang mga batang ito na ngayon ay nasa isang extensive study tour sa bagong lungsod, kasama ang limang elementary school teacher.
Pormal na ipinakilala ni Mayor Emmanuel Maliksi ang mga bisita –pawang Grade 6 students — mula sa SoKor sa idinaos na Monday flag raising ceremony, na ayon sa alkalde, tuturuan ng wikang Filipino, ipararanas ang pagkaing Pinoy at ipakikila ang mabubuting kultura ng mga Caviteno.
“Actually po, noon pa ay may exchange student program na ang Imus, pero ang delegasyon ng mga batang Koreano ang unang-una matapos na tayo ay maging ganap na lungsod,” sabi ni Mayor Maliksi. Noon pa, dugtong ng alkalde, ay dumalaw na sa siyudad ang isang delegasyon ng mga estudyante mula sa China, pati ang ilang pangkat ng mga bagong investor mula sa Japan.
“Nakakatuwa ang mga bata, nagustuhan nila ang pansit natin, at kumain din sila ng adobong pusit,” natatawang sabi ni Vice Mayor Ilano nang itanong kung ano ang nagustuhang ng mga bisitang Koreano sa pagkain natin.
Ayon kay Sir Vic Cuarto, foreign affairs officer ng City of Imus, dumating ang mga Koreano noong Hulyo 15 na ipinadala ni Yeoncheon City Mayor Kim Kyu San.
“They are here to attend to a month-long English language program to be held in the International British Academy (in Barangay Anabu),” sabi ni Cuarto sa pahayagang ito.
Kasama ng mga bata ng dalawang elementary school teacher Mr. Lee Sang Pung at Mr. Kim Seung Hwan, at si Ms. Kim Hye Sook ng Social Welfare Administration, at ang delegasyon ay pinamumunuan ni Mr. Kim Jong Uk, opisyal ng International Relations Department of Yeoncheon.
Kasabay ng pag-aaral ng wikang Filipino ng mga bisitang Koreano, 30 estudyanteng Imuseño ang tuturuan naman na magsulat at magbasa ng lengguwaheng Koreano, paliwanag ni Sir Vic.
Magkakaroon din ng palitan ng araling pambata ang mga kabataang Pinoy at Koreano – na laging sinasamahan ni Imus SK president/Councilor Darlon Sayarot.
Sa unang almusal ng mga bisita sa city hall, sinabayan sila sa pagkain nina Vice Mayor Mandy Ilano, GSO chief, Kuya Monmon Arguelles, Konsehal Ony Cantimbuhan, Konsehal Miong Aguinaldo at ABC Pres./Konsehal Totie Ropeta at ni Councilor Darlon Sayarot, bilang “official escort/tourist guide” at nagsilbing “yaya” ng mga batang Koreano ang mabait na chief of staff ni Mayor Maliksi, si Ate Nahney G. Alce.
“Sarap na sarap sila sa pansit natin, at next meal nila, sinampalukang manok at iba pang native food natin ang ihahain namin sa kanila,” ani Ate Nahney.
Pansin na pansin niya ang likas na pagkamagalang ng mga bata. “Tayo ay nagmamano sa matatanda bilang tanda ng paggalang, sila naman ang pagyukod at pagdidikit ng mga palad ay pagpapakita nila ng respeto sa matatanda. Isa itong kulturang dapat nating gayahin,” ani Ms. Alce.
Nitong nakalipas na araw, ipinasyal na ang mga bata at kasamang mga guro sa Imus Museum at sa mahahalagang historical sites ng siyudad Ayon kay Vice Mayor Ilano, plano rin ng pamahalaang lungsod na magpadala ng 20 estudyante sa Yeoncheon bilang exchange students para sila naman ay maturuan ng kulturang Koreano.
Pabiro, itinanong ng pahayagang ito kung maturuan kaya ang mga batang Koreano na kumain ng native delicacy nating itlog na balut at matutong magsawsaw ng ulam sa bagoong.
“Susubukan natin,” malakas ang tawang sagot ni Sir Vic. /Imus City Information Office.
26 KOREANO “AMPON” NGAYON NG IMUS CITY
By: ELI TAPARAN II│Operation Eposé Vol. 10 Blg. 02 July 22 - July 28, 2012



No comments:
Post a Comment